- 63 -

1456. o, T.

In nomine domini amen. Ea que hominum tractantur per opera, ab hominum delabuntur memoria. Consonum est ut ipsa litterarum roboribus certissone consolidentur. Nos igitur Frater Martinus divina largiente gracia Abbas Monasterij Rude ordinis Cisterciensis Wratislauiensis diocesis tenore presencium recognoscimus universis et singulis presentem paginam inspecturis Quod honestus et laboriosus vir Bartholomeus Incola et Iure possessorio Subditus ville nostre Dobroslawicz quondam Scultetus ibidem Nostri in presencia constitutum matura deliberacione sanoque corpore, interveniente desuper consensu pariter et assensu animi proprij, non coactus nec compulsus violenter sed bona et paterna benivolencia aclinatus, vendidit et tradidit ac hijs scriptis vendidisse et tradidisse rite ac racionabiliter iustoque vendicionis et tradicionis titulo Sculteciam quam Iure emptorio a multis annis ibidem in prefata villa Dobroslawicz possidebat obtinendo, Honesto ac laborioso Iohanni Filio suo legittime procreato suisque heredibus et successoribus legittimis, et hoc cum omnibus usibus fructibus et utilitatibus, pascuis, agriculturis et breviter cum singulis proventibus et utilitatibus ad eandem Sculteciam pertinentibus habendam tenendam et ad usus suos perpetue convertendam, pro quinquaginta et sex florenis seu Ducatis monete ungaricalis, testibus et Scabinis pro tempore illo ad premissa ydoneis videlicet Pyotr Maly, Woyteck Schuri, Ien Fulneck, Iyn Wawrzek. In cuius rei testimonium Sigillum nostrum Abbaciale est appensum. Acta sunt hec omnia sub Anno domini Millesimo Quadringentesimo Quinquagesimo sexto.

Das Siegel fehlt.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.